‪the Market Place‬

Karim El-Shabrawi

السعر: ٢٠٠ درهم للفرد (موجود في entertainer) و الأطفال من ٦-١٢ سنة ٥٠٪؜ تخفيض و اقل من ٦ سنوات مجاناً متضمناً البوفيه و المشروبات الغازية و العصائر و الشاي و القهوة بأنواعهما .. 1️⃣أول نقطة في ال review هي الاستقبال: استقبال رائع كعادة فنادق و مطاعم دبي لكن ما يميز المطعم و العاملين فيه هو معاملتهم للأطفال بترحاب شديد و الهزار و الضحك معاهم حتى انهم بيساعدوا الأهل في تحفيز الولاد على إنهاء أكلهم لدرجة ان المضيف اللي كان مسؤول عن طاولتي عرض على بنتي الصغيرة hot chocolate لو خلصت أكلها و كان كل ما يجي على الطاولة يفكرها و يطمن أكلت وللا لا.. نظام المطعم قائم على الجريل و ده اول حاجة بنشوفها و احنا داخلين المطعم و أنت بتطلب من الشيف اللي أنت عاوزه يشويهولك و يبعته على طاولتك. 2️⃣ جودة الأكل و المشروبات: بوفيه seafood 🦞 محترم جداً و متنوع بين المقبلات الباردة (جمبري/كابوريا/بلح البحر) و سلطات كتير منها ما يتضمن مأكولات بحرية و منها لا يتضمن. الشوربات في منها نوعين واحد حراق (سبايسي) و التاني لا و اضافاتك على الشوربة ايضاً متنوعه و لذيذة. *️⃣الجريل نفسه بقى (و ده الشغل كله) في جمبري كبير و استاكوزا مقسومة نصفين (بيحسبوا النص الواحد واحدة) يعني لما تيجي تطلب الاستاكوزا اعمل حسابك بزيادة شوية عشان هي مش كبيرة اوي و مقسومة نصفين (انا و مراتي طلبنا ٨ انصاف) و في سمك سلمون شرايح و في سمك صحيح (سمكة كاملة) و غير كده في كمان مشويات (كفتة و كباب و شيش و تكا) تتبيلة السمك و الجمبري و الاستاكوزا هائلة و في جمب الجريل صوص رائع (butter lemon sauce) و ده في تناغم هايل بينه و بين كل ال seafood . و في كمان صوص للمشويات (pepper sauce) بتطلب الكمية اللي أنت محتاجها و بتجيلك على الطاولة بعد شوية... في كمان Resotto station و دي مش هأقول رأيي فيها لأني بصراحة مجربتهاش. جمبها على طول في مجموعة من المقليات اللذيذة (كالماري/سمك/تامبورا) و معاها مجموعة صوصات حلوة (كاتشب/باربيكيو/ تار تار) طعم المقليات بشكل عام حلو بس يعيبها انها مش متصفية كويس من الزيت . بعد كدة نتكلم عن البوفيه نفسه فهتلاقيه بيبدأ ب أرز بخاري ابيض و خلطة seafood و باذنجان في صوص كاري و بطاطس مشوية و دجاج بالزبدة على الطريقة الهندية و أحلى ما في البوفيه و هو البرياني بال seafood بجد كان عظيم و تتبيلته هايله و مليان بلح بحر و جمبري و كاليماري.. اخر station كانت Sushi 🍣 و ده عيبه الوحيد ان الاختيارات محدودة إلى حدٍ ما لكن الطعم عظيم و موجود كل الصوصات اللي هاتحتاجها مع السوشي... العصائر متوفر نوعين (lemon mint/ cocktail) و ده طبعاً included في البوفيه و متاح كمان كل أنواع المشروبات الغازية و المياه العادية و الغازية و معظم أنواع الشاي المعروفة و القهوة. الحلويات تنوعها مرعب لدرجة انك بتبقى عاوز توقف اكل رغم طعامته عشان توفر مكان للحلو في اكتر من ٦ أنواع كيك بالشيكولاتة و الكراميل و الفاكهة و في أم علي راااائعة و في بودنج شيكولاتة و حلويات شرقية و فواكه فريش (بطيخ/أناناس) 3️⃣ السعر مقارنة بجودة الأكل بصراحة ممتاز خصوصاً لو معاك entertainer 4️⃣النظافة ممتازة رغم انها ليلة seafood و بيبقى في قشر في كل حتة الا انهم بصراحة ما بيبطلوش تنضيف.. 5️⃣الحمامات كمان نضيفة جداً و ريحة الصابون اللي عندهم قضت تماماً على ريحة السمك و خلافه 6️⃣تقييم عام للتجربة : تقترب من الامتياز و الحاجة الوحيدة اللي كانت تخليني اديهم امتياز هو موقع الفندق نفسه و عدم وجود أي اطلالة مميزة لكن ال ambience الداخلي ممتاز... و أخيراً أحب أأكد على ان دي تجربتي الشخصية اللي كانت يوم الخميس الماضي ٥ ديسمبر

منوعات عامة ومعلومات مفيدة

جيد